बुद्धिसगरका केही उत्कृष्ट भनाइहरु

नेपाली युवा माझ लोकप्रिय व्यक्तित्व, कर्णाली ब्लुज, फिरफिरे जस्ता लोकप्रिय कृतिका सर्जक, नेपाली साहित्यमा एक चर्चित नाम बुद्धिसगरका केही चयनित भनाइहरु:

१. असल शिक्षा त्यो हो जसले प्रश्न गर्न सिकाउँछ । खराव शिक्षा त्यो हो जसले उत्तर रट्न सिकाउँछ ।

२. अरुले आफ्ना बारेमा के सोच्छन्, त्यो महत्वपूर्ण होइन । आफूले ‘आफ्ना’ बारेमा के सोचिन्छ, त्यो महत्वपूर्ण हो ।

३. एसएमएस जस्तो स्वाट्ट आउने र फ्याट्ट जाने कुरा नगर । कुरा गर त, चिठीजस्तो । ढिला आउने, पढिरहूँ लाग्ने ।

४. त्यो नै असल मानिस हो, जसले हरेक बिहान ऐना हेर्दा, प्रतिबिम्बमा आउने मानिसप्रति गर्व गर्न सक्छ ।

५. अहिलेका पीडाहरुनै पछि गएर जीवनका अमूल्य सम्पति हुनेछन् ।

६. बाटो ओरालो लागेर पातालै पुगेपनि एक न एकदिन उकालो लाग्छ । त्यसैले हिँड्न छाड्नु हुँदैन ।

७. सबैभन्दा ठूलो बरदान– काम गरिगरि कामले नै थाक्नु । सबैभन्दा ठूलो श्राप– आराम गरिगरि आरामले नै थाक्नु ।

८. शिशिरमा झरेको अन्तिम पातले बसन्तमा फूलहरुको लस्कर लिएर आउँछ । आँसु त्यतिकै खसेको होइन …

९. फूलको काम फुल्ने हो, फुलिरहन्छ । मेरो बासनाको ‘मूल्याँकन’ भएन भनेर कचकच गर्देन।

१०. एकपल्ट आफूले दिएका आँसु पुछि दिएर त हेर, फेरि अरुलाई रुवाउन मन मान्दैन ।

११. जिउँनलाई धेरै केही चाहिदैन ! अलिकति सास, अलिकति आश, अलिकति आत्मबिश्वास । र, अलिकति प्रयास ।

१२. स—साना कुरामा पनि खितिखिति हाँस्नू, बाल्यकाल !
आँफुले हाँसेको अरुले पनि सुनून् भनेर जोड़जोड़ले हाँस्नू, युवाकाल !
हिँड्दै गर्दा बाटोमा केही सम्झेर एक्लै- एक्लै मुसुमुसु हाँस्दै हिँडिरहनू, बुढेशकाल ।

१३. अलिकति निहुरेर पस्नू हृदयमा । दैलोमा धेरैको टाउको ठोक्केको छ ।

१४. जो बढी आत्मिय हुन्छ, उसैको सानो कुराले पनि चित्त बेस्मारी दुख्छ । किनकी जति सानो होस् — नङमा लागेको चोट सबैभन्दा बढी दुख्छ ।

१५. सियोको डर त बेलुनझैँ अर्काको हावामा फुल्नेहरुलाई हो। हामी त सियोको टुप्पोले पाइतालामा अल्झेका खिल निकाल्छौँ !

१६. समुद्रले भन्यो- ‘म भित्र तिमीजस्ता अरबौ थोपाहरु छन् ।’, आशुले भन्यो ‘मेरा हरेक थोपा भित्र अरबौ समुद्रहरु छन् !’

स्रोत : बुद्धिसागरजीको फेसवुक पेज/प्रोफाइल